O pasado 20 de xaneiro, a Concellería de Alumeado do Concello de Ponteareas, que dirixe o concelleiro Domingo Freitas Dalmeida, puña en marcha un número de atención permanente onde, veciñas e veciños, poden dar parte de calquera incidencia ou avaría, as 24 horas do día e os 365 días do ano.
Agora, e de cara a reforzar dito servizo de atención ao cidadán, a Concellería de Alumeado vén de poñer en marcha un correo electrónico co mesmo fin: dar conta das avarías ou incidencias que afecten ao alumeado público. Amais, segundo o concelleiro delegado do servizo, Domingo Freitas Dalmeida, o correo electrónico posibilita que os veciños poidan mandar, se así o consideran oportuno, incluso fotos das incidencias das que están a dar parte.
Así ao teléfono de atención permanente ao público que funciona as 24 horas do día, que é o 986 64 22 45, engádese o enderezo de correo electrónico alumeadoponteareas@gmail.com. Usuarios e usuarias poden, polo tanto, dar conta de calquera tipo de acontecemento ou desarranxo que afecte a esta infraestrutura básica por calquera dos dous canles, coa seguridade, segundo sinalaba Freitas Dalmeida, que serán tidas en conta e solucionadas nun prazo non superior a unha semana.
Por outra banda, amais dese teléfono 986 64 22 45 e do correo electrónico alumeadoponteareas@gmail.com, os veciños e veciñas poden deixar constancia das avarías ou calquera tipo de incidencia, na oficina da Concellería de Alumeado, situada na planta baixa do Centro Social da rúa Oriente.

Os Comentarios estan Pechados.